|
Ich dr Schüll Mac Bläsi wohn am Bläsiring
s isch puure Zuefall dass y imme Kilt do sing
jä das mergg y jetz das schloot mr schön uffs Gmiet
wells mir do inn so richtig unde-uffe zieht
Scho uffem Wäg do hi do hani dänggt das wärs
sing doch vo jeedem Joor vom Schorsch dye beschte Värs
zwar e Orcheschter so wye är ha ich e kains
dr für dr beschti Gittarischt im Kilt dr Heinz
Wäg dääne haisse digge styffe Uniforme
muule dye maischte doch bi euch das ischs enorme
dr Kittel druggt aim wye e Panzer voll uff d Knoche
s haig-s au scho gä das aim dr Arm bim Spiil syg broche
jetz wäg de neue Uniforme ischs e so
jeede normale Mensch froggt sich wye das ka go
bi fünfezwanzig voll Aggtivi dasch e nätte
sinn mindeschtens über hundert Mainige vertrete
e baar vo euch sinn ganz gezielt nach Schottland gfahre
und hän ghüürote dört ich main so kasch au spaare
zwar isch das nit dr Grund dass dye nach Schottland schiile
nai dye hänn s Gfühl sy könne noochhär besser spiile
Zum e Schottische Schugger z Basel s isch e Hit
sait e Basler Schugger wo isch uff d Streifi mit
du bisch e typische Schott dä hätsch nit miesse griesse
dä het doch falsch pargiert dä hätsch jetz biesse miesse
Im 97 hänn ihr Bier go braue welle
worum das abvereggt isch will ich euch verzelle
ich hät euch dört dr Unterschiid scho könne nenne
s Bier duet me braue und nit wye dr Wysky brenne
Ihr hän ernoll e Gaschtspiil gä in Länzerhaid
e so hetts mir dr Polizischt dört oobe gsait
wo ihr durchs Dörfli sinn mit Drummle und mit Pfyffe
dyen dye vo Länzerhaid grad zue de Waffe gryffe
Jä nach dämm Daag stoht in dr Länzerhaiderzytyg
unter Lääserbrief e ganz e bösi Krytyg
syt dye do gspiilt hänn schrybt dr Tierarzt Doggter Sutter
hän d Kieh statt Milch jetz alli Joghurt in de Utter
dye laidig Froog : was traage d Schotte unterem Kilt
setz ich e moll uss myner Sicht ins rächte Bild
ich ha doch gseh dass bi euch au no Fraue spiile
ich wär dr füür mir giengt-i dört go drunter schiile
|
